40. EEN DRENT DIE MÈT TELT / 2

Huis van de schilder

v v LOUIS ALBERT ROESSINGH (1873 - 1951)

’t Haar niet veul scheeld, of Roessingh was ok börgemister van Westerbörk worden. Zien va ha dit gaern wild, maor Roessingh zölf vuulde der niet zo bar veul vöör. As ’t ok deurgaon was, dan hadde zien netuur, zien vrije leven ok tèveul geweld andoen moeten en dat was veur hum wis een tegenvaller worden. Dus maor goed, dat de minister doe een aner veurdragen hef.

Roessingh was beter ter stee tussen de ieken en de barken en de golden braom van de Zaandhof, in Elp. Hie hòldt van dit darp, van dit laandschup en van de rust, die der vanoet giet; hier kanne warken, en met ’t volk kanne praoten – as ’t hum zint – en as ’t hum niet zint, dan kanne der met zwiegen, net zoas ’t valt. Hie is een ienvoldeg, hartelek maens, een “gewone kaerel”, laow maor zeggen. Vrundelk tegen elkiene. De gaoven, die hij met kregen hef, die wette goed te besteden en as wij zien schilderswark ziet, dan moe wij Hans Heijting gliek geven as die in een studie over Roessingh zeg: “Roessingh is een kind van Drente en hij heeft over het oude Drentse land àl zijn liefde uitgestort”.

Unner zien laandschappen treffe wij jeweelties van schilderkuunst an. Zien bommen bint met grote liefde schilderd, net zoas hij ze in warkelijkheid plaant en met grote liefde verzörgd hef op zien Zaandhof. Prachteg mooi bint zien winterlaandschappen. Der giet een betovering oet van dit stille laan dunner de witte sneij, met de dreigende kale takken tegen de donkere sneijlocht. ’t Is of ’t zò weer begunnen zal te sneijen. Ok de petretten, die Roessingh schilderde, die bint van een grote natuurlijkheid. En dan is ’t veur ’t naogeslacht zo bezunder waerdevol, dat Roessingh in zien wark zo mooi de kliederdracht van ’t Drentse volk vastlegd hef. Daor mug wij hum aaltied daankbaar veur blieven. Ok in zien schilderwerk blif Roessingh “gewoon”. Hie zöcht zuk niet oet te leven in ien of ander “isme”. Hie schilderde de dingen zoas hie ze zag en zoas elk ze zien kun en hie gef dit döör in zien wark: aerlijk en begriepelk, zoasse zölf was.

Wij hadden ’t er al over, dat Roessingh ok dichter was. Een hiel aoreg bundeltie is der op zien 75ste verjaordag – in 1948 – oetgeven, waorin döör dr. Naarding een keur van hiel gevulege gedichties – paartie met hiel mooie humor – bij ’n kanner gaard is. “’t Diggelhoes” het dizze bundel. Roessingh hef nog wal veul màèr gedichties maakt, die in de loop van de jaoren miest plaosd bint in de Neije Drentse Volksalmanak. Bij gelegenheid van zien 75ste verjaordag weur Roessingh benuumd tot aereburger van de gemiente Westerbörk, een aer, die hum zeker toekwamp. Lang wil heffe der niet van had, want goed twee jaore later isse störven. Zien naobers oet Elp hebt hum henbracht, hen de “Roessinghakker” in Börk.

Met Roessingh is een Drent hen gaon, die in al zien ienvold groot was, die vöör Drente van gròte betiekenis west hef: een Drent, die mèt telt.

Bron: Artikel ‘Drenthen die mèt telt’ deur Gerriet Kupers in Oeze Volk, juli 1973

ELP - Zaterdag. De Drentse taol was nog nooit zo actueel. Op de voorpagina van het Dagblad van het Noorden lees ik vandaag:

Veur elkenien die holdt van de Drentse taol was ’t gistern een belangrieke dag. In Beilen is het Huus van de Taol officieel lösdaon. De stichtingen Drentse Taol, Het Drentse Boek en Oeze Volk gaot samen wieder under ién dak. ’t Huus van de Taol prebeert met meer as honderd vrijwilligers de Drentse taol te beholden en oet te bouwen. De metwarkers bint gangs met veul zaken; van ’t organiseren van streektaolcursussen tot ’t oetgeven van Drentse boeken. Het Huus van de Taol wuur lösdaon deur Willemien Schaap. Heur man Hans Schaap hef as gedippeteerde veur zien overlieden in 2006 de anzet geven tot de vörming van het Huus van de Taol. Elkenien had daornao de gelegenheid um het neie huus ies goed te bekieken. Een drankie was der vanzölf ok en een klein stukkie in de linkerhaand ontbrak ok niet. Der was een hoop volk oet de Drentse wereld van taol, kunst, cultuur en politiek anwezig.

Zie ook de nieuwe website van het Huus van de Taol.nl