Toen wij nog kinder waren
was alles aanders as nou
aj dan bijtieds opstunden
reupen wij ….hiel gauw
Gelukkig Neijaor !
heij de jaorskoeken klaor?
een zeupie der bij
da’s goed veur mij!
wij nuumden dat dan
mekaar ’t neijaor ofwinnen
zo gungen wij bij al oes naobers
en kundig volk naor binnen
Ok ooms en tantes deden wij an
mor opa en opoe `t eerste heur
wij hadden veur de oldern veul ontzag
en zie waren der oes dankber veur
glassie rood en vruchies
oet weck was oes zeupie
toch weuren wij “dronken”
nou ja….zo leupen ie !
wat kregen wij een wil
met ’t karbitbussie op ’t sportveld
non ist allemaol vuurwark
en ’t kost een hieleboel geld
kwaojonges leupen ’s aovunds
met allerhaand gerei te zeulen
de kleinties in hoes, deden
een spellegie “mallemeulen”
met `n allen om de taofel
‘k weet nog krek hoe ’t was….
op d`aole kalender kwamen streepies
en wat knoopies van `n versleten jas
`k zie moe nog eem de kachel oppoken
wij hadden der iene met ’n hekkie umtoe
wat kun e seins mooi rood weden
en dan keek ik bliede naor mien moe
va dee dan zien körte bienties
op plaatstoof under taofel
ik kreeg een koppie sukelaomelk
met een iegen gebakken waofel
ok gungen wij namen opgeven
’t begunt met ’n A,B of weet ik veul
ie kenden nog iederien in’t darp
ik zul ’t nog geern ies eem beleven
nou moej niet denken volk, dat `k
achterum wil kieken en niet veuroet
mor um ’t geluk nog eempies….
vast te pakken dat döt allien mar goed
’t woordtie Geluk,hol`t vaast
’t wil oes zo gauw weer
deur de vingers glieden
wij kunt er wat van rond gaon streien
um ok een aander te verblieden
volk een nei jaor brek weer an
proost allemaol op `t neie jaor!
lao`w net as vrogger naobers blieven
met’n beetien andacht veur mekaor!
Janny Kok-Wolbers
Janny Kok-Wolbers (1933) is geboren in Elp en woonde tot haar huwelijk, begin jaren vijftig, op het adres Hoofdstraat 11. Zij woont nu in Ruinen. Janny is haar hele leven al bezig met de Drentse taal en heeft daar veel in gepubliceerd. Zij vindt de Drentse taal cultureel erfgoed waar Drenten zuinig op moeten zijn.
Geen opmerkingen:
Een reactie posten
Opmerking: Alleen leden van deze blog kunnen een reactie posten.