ELP - Vandaag het laatste deel van de column, die Gerrit Kuipers midden jaren tachtig schreef in "Het Nieuwsblad voor Beilen". Hij keek daarin terug op zijn jaren bij de Elper Revue; specifiek op de revue "Dat is Elp", welke in 1951 door hem is geschreven:
- -- Buien boven Elp ---
.... Henderk Mulder – de Elper dichter – gunk met een praotie over ’t weer het Hiele darp in ’t ronde;
Der komp wind, zeg Marinus Kwint;
En dan zeg aol Betten: der komp een bui opzetten.
Dan zeg Kampings Géertie: wij kriegt nog een mal wéertie.
Net waj zegt, zeg Jan Smegen wij kriegt een beste bui regen.
Maor dan zeg Jan Koorsie: dat duurt nog wal een posie;
Waorop Géert Bosman: der komp nog niks van.
En Haddes Géert: wal nee, ’t vertéert.
Dan zegt Jan Welling van Top: Kiek. ’t Heldert alwéer op.
Wordt nog mooi, zeg Mientie Booi.
En Jenne van aol Harm: Foj, ’t wordt nog warm.
Dan zeg Joppen Griet; Man, ’t wordt nog hiet!
Maor dan komp aol’ Roef Sanders,
En zegt: Praot nou maor ies wat anders.
‘k Heb aans net zo lief daj zwiegt,
Want ie weet gienien van allen wat weer daw kriegt….
Vanzölf weur in de revue ok de koekoek nog in de kist daon. Dat heurt jao bij Elp. Vrogger mus ie ’t niet waogen um “koekoek!” te roepen as ie deur Elp hen fietsten; dan vleugen je de stienen nao. Dat is gelukkig almaol aans worden. Het café in Elp drag zölfs de naam “Koekoekshof”. Waor men vrogger hellig um weur, daor bint ze nou wies op. Der veraandert toch wal wat in de wéreld; in Elp ok wal.
Zo weuren der allerhaande schetsies speuld over ’t Elper leven van die dagen; neis oet Elp, want Elp stund doe geregeld in ’t neis in ’t Beiler kraantie. Over de boervergadering, waorin zie prootten over boerwarken, over kuunstmes veur ’t voetbalveld, over ’t rookverbod op de mietenakker (mieten ziej op ’t heden ok niet meer) en nog veel meer zaken kwammen op ’t batterij.
Ik kan wal een kraant volschrieven over mien Elper herinnerings, maor dat zuw maor niet doen. Een stuk of wat dingen heb ik even de revue laoten passeren. De tenielclub is nog aaid springlimdig en alle jaoren voert het Elper jongvolk veur volle zalen de Elper Revue op! Laot dat nog lang zo blieven.
----------
Geen opmerkingen:
Een reactie posten
Opmerking: Alleen leden van deze blog kunnen een reactie posten.